Presidenti i Shteteve të Bashkuara, Donald Trump, ka reaguar me tone të forta pas vrasjes së aktivistit konservator Charlie Kirk, duke e cilësuar ngjarjen si një akt mizor dhe paralajmëruar ndjekje penale ndaj jo vetëm autorëve të drejtpërdrejtë, por edhe strukturave që qëndrojnë pas tyre.
“Administrata ime do të gjejë të gjithë ata që kontribuuan në këtë mizori dhe dhunë tjetër politike, përfshirë organizatat që i financojnë dhe i mbështesin ato,” deklaroi Trump në një mesazh video të publikuar në rrjetet sociale, duke e cilësuar vrasjen si pjesë e një klime të rrezikshme politike që po përshkon vendin.
Në fjalimin e tij, kreu i Shtëpisë së Bardhë tha se vrasja e Kirkut është simptomë e një polarizimi të thelluar dhe të rrezikshëm. “Charlie ishte një patriot, një zë i rinisë amerikane dhe një mbrojtës i lirisë. Vrasja e tij është një alarm për të gjithë ne. Amerika ka hyrë në një moment të errët,” tha Trump.
Deklarata e presidentit vjen në një kontekst të tensionuar, me protesta të shpërthyera në disa qytete të SHBA-së pas ngjarjes tragjike në Universitetin e Luginës së Utah-ut. Kirk, themelues i organizatës konservatore Turning Point USA, u qëllua me armë gjatë një tubimi publik më 10 shtator. Autoritetet amerikane kanë konfirmuar se hetimet janë në fazë intensive, ndërsa një i dyshuar është ende në kërkim.
Përveç Trumpit, figura të tjera të larta politike kanë shprehur pikëllim dhe zemërim për vrasjen e Kirkut. Zëvendëspresidenti JD Vance, si dhe senatorë dhe guvernatorë republikanë dhe demokratë, kanë dënuar aktin dhe kanë bërë thirrje për unitet kundër dhunës politike.
Charlie Kirk, 31 vjeç, ishte një figurë e njohur në radhët e aktivizmit konservator, i njohur për debatet publike në kampuse universitare dhe për mbështetjen e hapur ndaj politikave të administratës Trump. Vdekja e tij ka tronditur jo vetëm mbështetësit, por edhe kundërshtarët politikë, të cilët kanë dënuar dhunën si të papranueshme në një demokraci funksionale.
