Kryetari i Lidhjes Demokratike të Kosovës, Lumir Abdixhiku, ka paralajmëruar një ndryshim të mundshëm të kursit politik të partisë që drejton, nëse sipas tij, vazhdon mosrespektimi i Kushtetutës së vendit.
Në një intervistë për emisionin “Rubikon” në Klan Kosova, Abdixhiku tha se LDK-ja mund të braktisë institucionet dhe të kalojë në veprim protestues jashtë tyre.
Kreu i LDK-së theksoi se partia e tij ka vepruar brenda institucioneve për më shumë se dy dekada, por nuk e përjashton mundësinë e largimit nga rruga institucionale nëse Kushtetuta nuk respektohet.
“LDK-ja e ka konsideruar veprimin e vet politik tash e 25 vite brenda institucioneve të Kosovës. Ende nuk është ardhur në atë pozitë që të konsiderojë veprimin jashtë tyre. Por nuk e përjashtojmë si alternativë,” tha Abdixhiku.
Ai sqaroi se çdo vendim për të dalë në protesta do të merret në mënyrë të organizuar, përmes strukturave të partisë.
“Në momentin që ne e vlerësojmë se duhet të dalim në protesta dhe të largohemi prej rrugës institucionale, në atë moment mbledhim organet e partisë, braktisim institucionet, dalim në rrugë,” deklaroi Abdixhiku.
Duke e cilësuar Kushtetutën si “referin” e funksionimit institucional, Abdixhiku tha se mungesa e respektimit të saj e bën të pakuptimtë pjesëmarrjen në proceset parlamentare.
“Nëse nuk ka refer dhe nuk ka rregulla kushtetuese, nuk ka kuptim të presim në Parlament e të themi ‘hajde po vazhdojmë tutje’,” u shpreh ai.
Deklaratat e Abdixhikut vijnë në një moment kur debati mbi respektimin e normave kushtetuese dhe funksionimin e institucioneve ka marrë hov, veçanërisht në kontekstin e përplasjes mes pushtetit dhe opozitës për çështje të ndjeshme si reforma zgjedhore, dialogu me Serbinë dhe ndarja e pushteteve.
Ky paralajmërim nga LDK mund të sinjalizojë një fazë të re të mobilizimit opozitar, me pasoja të mundshme për stabilitetin politik dhe institucional të vendit.
