Kryeqyteti shqiptar mirëpret një nga ngjarjet më të rëndësishme të futbollit europian, mbledhjen e Komitetit Ekzekutiv të UEFA-s, një zhvillim që Presidenti i Federatës Shqiptare të Futbollit, Armand Duka, e cilësoi si një vlerësim të drejtpërdrejtë për progresin e futbollit në Shqipëri.
Në një prononcim publik, Duka shprehu mirënjohjen e tij për Presidentin e UEFA-s, Aleksander Çeferin, duke theksuar se vendimi për të mbajtur këtë mbledhje në Tiranë është një dëshmi e bashkëpunimit të ngushtë mes FSHF-së dhe institucionit më të lartë të futbollit europian.
“Ky është një vlerësim jo vetëm për Federatën e Futbollit, por për të gjithë komunitetin e futbollit shqiptar,” – deklaroi Duka.
“Nuk është thjesht një mbledhje, është një event i rëndësishëm që përfshin edhe festivalin e futbollit, një aktivitet që besoj se do të mbetet gjatë në memorien e fëmijëve dhe do t’i motivojë ata të jenë pjesë e lojës sonë.”
Mbledhja e KE-së në Tiranë po ndodh në një moment kur futbolli shqiptar ka shënuar përparime të dukshme në infrastrukturë, organizim dhe pjesëmarrje ndërkombëtare.
Për Duken, ky takim është një sinjal i qartë se Shqipëria po konsolidohet si një aktor serioz në hartën e futbollit europian.
Ngjarja pritet të sjellë jo vetëm vëmendje institucionale, por edhe një frymë festimi dhe angazhimi për brezat e rinj, duke e kthyer futbollin në një platformë të fuqishme për zhvillim social dhe kulturor.
