Çfarë do të thotë që Elon Musk është gati të bëhet trilioneri i parë në botë? – pyeti Papa Leo XIV në intervistën e tij të parë që kur u zgjodh në krye të Vatikanit.
Intervista u dha nga Papa për revistën amerikane Crux dhe fragmente të saj u botuan sot nga gazeta peruane El Comercio.
Papa theksoi hendekun në rritje midis të ardhurave të të pasurve dhe të varfërve, si dhe midis punëtorëve dhe drejtorëve ekzekutivë të kompanive private.
Papa amerikan shtoi më pas: “Lexova lajmin se Elon Musk do të bëhet trilioneri i parë në botë. Për çfarë bëhet fjalë dhe çfarë domethënie ka? Nëse kjo është e vetmja gjë që ka vlerë sot, atëherë ka një problem të madh.”
Duke iu referuar çështjes ukrainase, ai theksoi se beson se duhet të ushtrohet presion, nga shumë anë, për ta bërë të qartë se dallimet mund të zgjidhen në një mënyrë tjetër.
“Unë besoj fuqimisht se nuk mund ta humbasim kurrë shpresën. Kam besim të madh te raca njerëzore”, tha Papa Prevost.
Sipas Atit të Shenjtë të Katolikëve, në kohën tonë “polarizimi duket të jetë një nga fjalët më të forta. Por nuk ndihmon askënd. Ose nëse ndihmon disa, është diçka minimale, pasi të gjithë të tjerët vuajnë”.
Lidhur me mënyrën se si ka ndryshuar jeta e tij në muajt e fundit, Papa Leo theksoi se “ka ende shumë gjëra që ai duhet të mësojë”.
Siç shpjegoi ai, “elementi i ri është se ai papritmas e gjeti veten në nivelin e udhëheqësve ndërkombëtarë” dhe se “gjatë kësaj periudhe ai po zbulon rolin që ka luajtur Selia e Shenjtë në fushën e diplomacisë”.
Së fundmi, lidhur me procesin e sinodalitetit brenda Kishës Katolike Romake, Papa Leo deklaroi: “qëllimi nuk është transformimi i Kishës në një lloj qeverisjeje demokratike, sepse, nëse i shohim shumë vende sot, demokracia nuk është domosdoshmërisht zgjidhja perfekte për gjithçka”.
