Sinisha Karan do të jetë kandidati i Aleancës së Social-Demokratëve të Pavarur në zgjedhjet e parakohshme për president të Republikës Srpska në Bosnje-Hercegovinë, ka konfirmuar kryetari i partisë, Millorad Dodik.
Dodik, ish-president i këtij entiteti serb, tha për Radio-Televizionin RS se Karan do të propozohet para partnerëve të koalicionit.
Karan figuron në listën e zezë të Departamentit amerikan të Thesarit për pjesëmarrje në organizimin e festave jokushtetuese të Republikës Srpska, sipas raportimeve të REL. Ai është gjithashtu profesor i çështjeve kushtetuese dhe ministër për Zhvillim Teknologjik dhe Shkencor në Qeverinë jokushtetuese të këtij entiteti.
Zgjedhjet e parakohshme janë thirrur për 23 nëntor, pasi Gjykata e Bosnje-Hercegovinës ia ka revokuar mandatin Dodikut për mosbindje ndaj vendimeve të Përfaqësuesit të Lartë ndërkombëtar, duke e pamundësuar që ai të mbajë ndonjë pozicion publik për gjashtë vitet e ardhshme.
Fillimisht, partia e Dodikut kishte njoftuar se nuk do të merrte pjesë në zgjedhje, por më pas vendosi të kandidojë.
Partia më e madhe opozitare, Partia Demokratike Serbe, ka shpallur kandidatin e saj për president, Branko Bllanusha, profesor në Fakultetin e Inxhinierisë Elektrike në Banjallukë.
