Fotoreporteri francez Antoni Lallican, 38 vjeç, u vra këtë mëngjes nga një dron ndërsa po realizonte një reportazh rreth pesëmbëdhjetë kilometra larg vijës së frontit, në Kurylivska.
Këtë e njoftoi Unioni Kombëtar i Gazetarëve, sindikata kryesore e këtij profesioni në Francë, duke shpjeguar se fotoreporteri “po dokumentonte pasojat e luftës dhe kishte punuar gjatë pranë banorëve të zonës minerare të Donbass-it, në juglindje të Ukrainës”.
Agjencia Hans Lucas, për të cilën punonte Lallican, theksoi se ai kishte punuar në Ukrainë disa herë që nga fillimi i konfliktit në shkurt 2022.
“Është hera e parë që një gazetar vritet nga një dron në Ukrainë”, deklaroi Unioni Kombëtar i Gazetarëve, duke shtuar se “rrethanat e incidentit janë ende në proces verifikimi”. Sindikata po ashtu njoftoi se “një gazetar ukrainas, Heorgiy Ivanchenko, u plagos në të njëjtin sulm”, i cili është cilësuar si “krim lufte”.
Viktimat mbanin shkrimin “Press” në veshjet e tyre mbrojtëse, sipas Unionit Kombëtar të Gazetarëve, i cili tha se që nga fillimi i pushtimit rus, 17 profesionistë të medias janë vrarë në Ukrainë.
