Portieri i Përfaqësueses së Kosovës, Aro Muriç, ka shkëlqyer këtë javë në kampionatin italian, duke u përfshirë në formacionin e javës në Serie A pas një performance të jashtëzakonshme me fanellën e Sassuolos.
Faqja e njohur e statistikave, “Sofascore”, i ka dhënë Muriçit notën maksimale, vlerësim që reflekton pritjet vendimtare dhe sigurinë që ai ka transmetuar gjatë gjithë ndeshjes.
Ky është një tjetër konfirmim i formës së lartë që po kalon gardiani kosovar, i cili me pritjet e tij ka qenë ndër protagonistët kryesorë të javës në futbollin italian.
Paraqitjet e tilla rrisin optimizmin edhe për Përfaqësuesen e Kosovës, e cila po përgatitet për ndeshjet e radhës kualifikuese ndaj Sllovenisë dhe Suedisë.
Tifozët shpresojnë që forma e shkëlqyer e Muriçit të përsëritet edhe me fanellën “dardane”, duke i dhënë ekipit kombëtar siguri dhe stabilitet në mbrojtje.
