Presidentja e Kosovës, Vjosa Osmani, ka reaguar lidhur me zhvillimet më të fundit në negociatat për paqe mes Izraelit dhe Hamasit, ku të dyja palët kanë nënshkruar fazën e parë të një plani paqeje, me ndërmjetësimin e ish-presidentit amerikan, Donald Trump.
Përmes një postimi në platformën X (ish-Twitter), Osmani e ka quajtur këtë një moment vendimtar për paqen në Lindjen e Mesme, duke vlerësuar përkushtimin e administratës Trump në këtë proces.
“Një moment përcaktues për paqen. Paqe që është urgjente. Paqe që ka kohë që duhej të arrihej,” ka shkruar Osmani.
Ajo ka lavdëruar lidershipin dhe përpjekjet e ish-presidentit Trump dhe ekipit të tij, duke theksuar rëndësinë e këtij hapi për izraelitët dhe palestinezët njësoj.
“Presidenti Donald Trump dhe administrata e tij kanë treguar lidership dhe përkushtim të vërtetë për të sjellë paqe të qëndrueshme për izraelitët dhe palestinezët, si dhe përkushtim të palodhur për t’i dhënë fund vuajtjeve që kanë duruar breza të tërë njerëzish të pafajshëm.”
Në reagimin e saj, presidentja Osmani ka shprehur edhe mirënjohje për ndërmjetësit ndërkombëtarë, duke përmendur Katarin, Egjiptin dhe Turqinë për rolin e tyre të rëndësishëm në lehtësimin e këtij përparimi diplomatik.
“Mirënjohja jonë shkon gjithashtu për ndërmjetësuesit nga Katari, Egjipti dhe Turqia për angazhimin e tyre të vazhdueshëm për paqen dhe për rolin e tyre vendimtar në mundësimin e këtij përparimi.”
