Mijëra palestinezë u nisën drejt veriut përgjatë bregdetit të Gazës të shtunën, duke ecur në këmbë, me makinë dhe karrocë për t’u kthyer në shtëpitë e tyre të braktisura, ndërsa një armëpushim midis Izraelit dhe grupit militant palestinez Hamas duket se po respektohet.
Trupat izraelite u tërhoqën sipas fazës së parë të një marrëveshjeje të ndërmjetësuar nga SHBA-të të arritur këtë javë për t’i dhënë fund luftës, e cila ka vrarë dhjetëra mijëra njerëz dhe ka lënë pjesën më të madhe të enklavës në rrënoja.
“Është një ndjenjë e papërshkrueshme; lavdi Zotit”, tha Nabila Basal ndërsa udhëtonte në këmbë me vajzën e saj, e cila tha se kishte pësuar një plagë në kokë në luftë. “Jemi shumë, shumë të lumtur që lufta ka ndaluar dhe vuajtjet kanë mbaruar.”
