Dy avionë të Forcave Ajrore Mbretërore të Britanisë (RAF) kanë kryer një mision të përbashkët 12-orësh me forcat amerikane dhe aleatët e NATO-s përgjatë kufirit me Rusinë, njoftoi Ministria e Mbrojtjes së Mbretërisë së Bashkuar të shtunën.
Sipas njoftimit, operacioni u zhvillua në fillim të javës dhe vjen pas një sërë shkeljesh të hapësirës ajrore të NATO-s nga dronë dhe avionë rusë në muajt e fundit.
“Ky ishte një mision i rëndësishëm i përbashkët me aleatët tanë të SHBA-së dhe NATO-s,” deklaroi ministri britanik i Mbrojtjes, John Healey.
“Jo vetëm që na ofroi informacione të vlefshme për rritjen e ndërgjegjësimit operacional, por dërgon edhe një mesazh të qartë se NATO është e bashkuar kundër Putinit dhe çdo kundërshtari tjetër.”
Në kuadër të misionit, një avion vëzhgues elektronik RC-135 Rivet Joint dhe një avion patrullimi detar P-8A Poseidon fluturuan nga rajoni Arktik përgjatë Bjellorusisë dhe Ukrainës, të mbështetur nga avioni furnizues amerikan KC-135.
Ministria britanike bëri të ditur se operacioni u ndërmor si përgjigje ndaj shkeljeve të hapësirës ajrore të disa vendeve anëtare të NATO-s, përfshirë Poloninë, Rumaninë dhe Estoninë.
Ndërkohë, më herët këtë muaj, udhëheqësit e Bashkimit Evropian kanë shprehur mbështetje për forcimin e mbrojtjes së bllokut kundër dronëve rusë, në kuadër të rritjes së kërcënimeve në lindje të kontinentit.
