Organizata e Kombeve të Bashkuara ka marrë dritën jeshile nga Izraeli për të rifilluar operacionet humanitare në Rripin e Gazës që nga dita e diel, konfirmoi një zyrtar i OKB-së për agjencinë Associated Press.
Sipas burimeve të OKB-së, rreth 170 mijë ton ndihma humanitare – përfshirë ushqime, ujë, ilaçe dhe materiale emergjente – janë tashmë të pozicionuara në vendet fqinje, si Jordania dhe Egjipti, në pritje të lejes për hyrje.
Gjatë 24 orëve të fundit, përfaqësues të OKB-së dhe autoriteteve izraelite kanë zhvilluar bisedime intensive për të përcaktuar sasinë e ndihmave që do të lejohen të hyjnë në territor, si dhe pikat kufitare nga ku do të realizohet dërgimi.
Agjencitë humanitare ndërkombëtare, përfshirë UNICEF, kanë bërë të ditur se janë plotësisht të gatshme të fillojnë shpërndarjen menjëherë sapo të hapen kalimet.
“Shpresojmë që të gjitha pikat e kalimit të hapen sa më shpejt,” – deklaroi një përfaqësues i UNICEF-it.
Rifillimi i operacioneve humanitare shënon një hap të rëndësishëm në përpjekjet ndërkombëtare për të ndihmuar popullsinë civile të Gazës, e cila përballet me mungesa të rënda ushqimi, uji dhe energjie pas muajsh bllokadash dhe përplasjesh të vazhdueshme.
