Partia liberale holandeze e qendrës e Rob Jetten ka fituar garën zgjedhore, sipas analizës së votave që tregon se ajo nuk mund të mposhtet nga populisti anti-islamik Geert Wilders.
D66 e Jetten aktualisht ka një epërsi të ngushtë prej 15,000 votash ndaj Partisë së Lirisë të Wilders, dhe agjencia holandeze e lajmeve ANP thotë se edhe pse numërimi i votave nuk është i plotë, Wilders nuk mund të fitojë më.
Jetten, 38 vjeç, tha se ishte “shumë krenar për këtë rezultat historik”, duke shtuar se tani kishte një përgjegjësi të madhe për të formuar një qeveri të qëndrueshme.
Parashikimet nga pothuajse 99% e votave i vendosin të dyja partitë në 26 vende në parlamentin me 150 vende – por ANP thotë se centristët e Jetten mund të fitojnë një vend të 27-të.
Wilders kryesonte sondazhet e opinionit para zgjedhjeve të së mërkurës, por Rob Jetten arriti të fitonte në disa nga qytetet kryesore holandeze, përfshirë Roterdamin, Hagën dhe Utrechtin, me një fushatë pozitive duke përdorur sloganin “Po, ne mundemi”.
Deri më tani ai kishte qenë i kujdesshëm të mos shpallte fitoren derisa të mblidheshin të gjitha votat, por ANP tha se bazuar në shifrat e votuesve me postë jashtë vendit, ai tani mund të shpallej fitues.
