Gjermania u zotua të mërkurën të vazhdojë “me lehtësimin e riatdhesimit” të refugjatëve sirianë në atdheun e tyre, mes deklaratave të Ministrit të Jashtëm Johann Wadephul, i cili ka dyshime për kthimin e tyre së shpejti.
“Vëmendja aktuale është përqendruar në stabilizimin e situatës në Siri, lehtësimin e riatdhesimit dhe mundësimin e kthimit vullnetar të refugjatëve. Ky është një proces që varet nga parakushte të shumta ligjore dhe qeveria gjermane po punon për to”, tha zëdhënësi i qeverisë Stefan Kornelius në një konferencë për shtyp në Berlin.
“Natyrisht, qeveria federale ka interes në stabilizimin e Sirisë. Ajo ka interes që sirianët të rindërtojnë vendin e tyre dhe të kthehen në Siri , dhe për këtë arsye, po e promovon këtë kthim. Megjithatë, duhet të ekzistojnë kushtet e nevojshme ligjore dhe materiale që kjo të ndodhë”, shtoi ai.
Komentet vijnë mes kritikave të ashpra ndaj Wadephul nga brenda partisë së tij Demokristiane për shkak se tha se kthimi i sirianëve ishte “i mundur vetëm në një masë shumë të kufizuar në kohën e tanishme, sepse një pjesë e madhe e infrastrukturës në këtë vend është shkatërruar me të vërtetë”.
Wadephul i bëri këto komente gjatë vizitës së tij të fundit në Harasta, një periferi të Damaskut, ku u trondit nga niveli i shkatërrimit si rezultat i luftës civile nga viti 2011 deri në vitin 2024.
Ndërsa kancelari Friedrich Merz përsëriti mbështetjen e tij për ministrin e kritikuar, ai njoftoi gjithashtu plane të hënën për një ftesë të Presidentit Ahmad al-Sharaa në Berlin për bisedime mbi tranzicionin politik të Sirisë, rimëkëmbjen ekonomike dhe riatdhesimin e refugjatëve.
“Lufta civile në Siri ka mbaruar dhe vendi tani ka nevojë për të gjitha burimet e tij, mbi të gjitha popullin sirian, për të rindërtuar vendin”, tha udhëheqësi konservator, duke shtuar se refugjatët pritet të fillojnë të kthehen në vendin e tyre.
