Kompania amerikane Google ka njoftuar një investim gjigant prej rreth 5 miliardë eurosh në Gjermani, në kuadër të zgjerimit të infrastrukturës teknologjike dhe kapaciteteve të saj të qendrave të të dhënave. Projekti përfaqëson një nga investimet më të mëdha të kompanisë në Evropë dhe synon të mbështesë transformimin digjital dhe klimatik të vendit.
Sipas burimeve të agjencisë Reuters, Google – pjesë e gjigantit teknologjik Alphabet Inc. – do të investojë rreth 5 miliardë euro në Gjermani, duke përforcuar praninë e saj në ekonominë më të madhe të Evropës.
Investimi parashikon ndërtimin e një qendre të re të dhënash në Dietzenbach, pranë Frankfurtit, si dhe zgjerimin e objektit ekzistues në qytetin Hanau, gjithashtu në rajonin e Hessenit, që njihet si një nga qendrat më të rëndësishme të industrisë financiare dhe dixhitale në Gjermani.
Një nga burimet e Reuters theksoi se projekti përfshin një shifër në “mesataren e miliardëve të ulët”, duke e bërë atë një ndër investimet më të mëdha të Google në kontinent.
Megjithëse kompania nuk ka dhënë ende komente zyrtare mbi shumën, ajo ka bërë të ditur më herët se do të “investojë miliarda në Gjermani për të adresuar çështje reale të së ardhmes përmes inovacionit, inteligjencës artificiale dhe transformimit klimatik neutral”.
Ky zhvillim vjen në një moment kur vendet evropiane po garojnë për të tërhequr investime në infrastrukturën dixhitale, ndërsa kërkesa për kapacitete të reja të përpunimit të të dhënave po rritet ndjeshëm për shkak të booming të inteligjencës artificiale dhe shërbimeve cloud.
Ky hap e pozicionon Google si një nga aktorët kryesorë të tranzicionit dixhital dhe klimatik të Evropës, duke forcuar rolin e saj strategjik në tregun gjerman të teknologjisë dhe energjisë së qëndrueshme.
