Federata e Futbollit të Kosovës ka zyrtarizuar ndryshime të rëndësishme në stafin teknik të Kombëtares U21. Pas kërkesës së tij dhe një marrëveshjeje të dyanshme, Afrim Tovërlani është liruar nga detyra e përzgjedhësit, ndërsa vendin e tij e merr ish-futbollisti i njohur, Hekuran Kryeziu.
Në njoftimin zyrtar, FFK thekson se Kryeziu është zgjedhur për të udhëhequr ekipin e të rinjve pas periudhës së tij si ndihmës i Tovërlanit. Federata vlerëson përvojën e tij të gjatë në fushën e blertë, si në nivel klubesh ashtu edhe me fanellën e Kosovës.
“Nga tani, përgjegjësinë e përzgjedhësit të Kombëtares U21 do ta marrë Hekuran Kryeziu, i cili deri më tani ka qenë ndihmëstrajner i Tovërlanit. Kryeziu, me një karrierë të bujshme si futbollist, do të vazhdojë punën bashkë me pjesën tjetër të stafit të trajnerëve, me synimin e vazhdimësisë së rezultateve pozitive dhe stabilitetit në ekipin kombëtar U21”, thuhet në deklaratën e Federatës.
FFK ka falënderuar Tovërlanin për kontributin e dhënë dhe i ka uruar suksese në angazhimet e tij të reja, ndërsa ka theksuar se federata do të mbetet e përkushtuar në afrimin e ish-futbollistëve të Kombëtares në role kyçe brenda strukturave të saj.
Ky ndryshim pritet të hapë një kapitull të ri për Kosovën U21, me shpresën për vazhdim të progresit dhe rezultateve të mira në arenën ndërkombëtare.
