Radio Televizioni i Kosovës ka ekzekutuar pagat për muajt tetor dhe nëntor, pasi Qeveria e Kosovës ka ndarë mjete shtesë për funksionimin e transmetuesit publik. Lajmin e ka konfirmuar ushtruesi i detyrës së drejtorit të përgjithshëm të RTK-së, Hysen Hundozi, i cili theksoi se pagesat janë bërë të mundura pas përpjekjeve të vazhdueshme institucionale për ta tejkaluar krizën financiare në të cilën ndodhej RTK-ja.
Hundozi u shpreh se mungesa e vendimmarrjes në Kuvend kishte krijuar vështirësi serioze për institucionin, por pavarësisht sfidave, puna dhe përkushtimi i stafit e kanë mbajtur funksional transmetuesin publik. Ai falënderoi punëtorët për durimin dhe besimin gjatë kësaj periudhe të vështirë.
Sipas tij, viti ka qenë i mbushur me pengesa financiare, por megjithatë RTK-ja ka shënuar përparime në raportet e brendshme me punëtorët, në forcimin e ligjshmërisë dhe në zgjerimin e bashkëpunimit me partnerë vendorë e ndërkombëtarë.
Hundozi tha se pas formimit të Kuvendit të ri që do të dalë nga zgjedhjet parlamentare, prioritet mbetet gjetja e zgjidhjeve të qëndrueshme ligjore për financimin dhe funksionimin afatgjatë të RTK-së. Ai theksoi se institucioni ka një vizion të qartë për t’u konsoliduar si transmetues publik modern dhe i pavarur, duke premtuar angazhim të vazhdueshëm për realizimin e këtij objektivi.
