Ajax u detyrua të ndërpresë ndeshjen e kampionatit kundër Groningen të dielën mbrëma pasi tifozët ndezën qindra mjete piroteknike në shkallët e “Johan Cruyff Arena”, duke e kthyer stadiumin në “ferr”.
Shfaqja e papritur e fishekzjarreve dhe flakadanëve nisi vetëm pesë minuta nga nisja e sfidës së Eredivisie-s dhe shpërthimet ishin aq të forta sa të dyja skuadrat u ndalën në vend.
Ndeshja u pezullua menjëherë dhe lojtarët u kthyen në tunel. Raportohet se shfaqja u bë në nder të një tifozi të Ajax-it që ndërroi jetë muajin e kaluar, por klubi reagoi ashpër pasi ndeshja u ndërpre.
“Ajax e konsideron absolutisht skandaloze atë që ka ndodhur sonte në stadium. Kërkojmë falje për këdo që është prekur në çfarëdo mënyre nga ky incident. Siguria e spektatorëve dhe lojtarëve është cenuar. Kjo është e papranueshme. Ne e dënojmë fuqimisht këtë sjellje të pahijshme. Fishekzjarrët nuk kanë vend në stadium. Spektatorët në sektorin e prekur u kontrolluan. U përdorën edhe qen për të zbuluar fishekzjarre, si para hapjes së stadiumit ashtu edhe gjatë hyrjes së tifozëve. U morën masa të tjera parandaluese. Megjithatë, nuk arritëm ta parandalonim situatën. Do të studiojmë pamjet e kamerave për të zbuluar autorët dhe do të hetojmë edhe në mënyra të tjera se kush është përgjegjës. Nëse identifikohen autorët, do të marrim masat e duhura”, shkroi klubi i Ajax në ‘X’.
Një tifoz i zemëruar i Groningen shkroi: “Minimumi këtu duhet të jetë dhënia e një fitoreje në tavolinë për Groningen, plus një zbritje pikësh aq të madhe sa të garantojë rënien e Ajax-it, dhe detyrimi që Ajax të luajë ndeshjet në shtëpi pa tifozë pa afat, si dhe ndalimi i tifozëve të Ajax-it të ndjekin ndeshjet jashtë fushe pa afat.”
Ky i sotmi ka qenë një sezon turbulent për klubin më të suksesshëm të Holandës. Ata janë përballur me vështirësi në shtëpi, me dy humbje dhe një barazim në tre ndeshjet e fundit të Eredivisie-s në Amsterdam.
Trajneri John Heitinga u shkarkua pas humbjes zhgënjyese 3-0 ndaj Galatasaray-t në Ligën e Kampionëve më 5 nëntor.
