KF Dukagjini ka hyrë në një fazë të artë pas emërimit të trajnerit Nue Pergjokaj, i cili mori drejtimin e skuadrës pas largimit të Ismet Munishit. Që prej marrjes së detyrës, Pergjokaj ka arritur të rikthejë energjinë dhe besimin te skuadra nga Klina, duke regjistruar tri fitore radhazi në Superligën e Kosovës.
Fitoret e fundit: Si mysafir ndaj Ferizajt dhe Llapit, si vendas ndaj Drenicës.
Këto rezultate e kanë katapultuar Dukagjinin në kuotën e 26 pikëve, duke ndarë kreun e tabelës me dy skuadrat më të forta të kampionatit, Ballkanin dhe Prishtinën. Ky sukses është një dëshmi e qartë e ndikimit të menjëhershëm të Pergjokajt, i cili ka sjellë disiplinë taktike dhe motivim të ri në grupin e lojtarëve.
Burime nga mjedisi i KF Dukagjinit theksojnë se atmosfera në ekip është e jashtëzakonshme. Lojtarët kanë reaguar pozitivisht ndaj stilit të ri të trajnerit, duke treguar më shumë agresivitet dhe organizim në fushë. Pergjokaj shihet si një trajner pragmatik, që ka ditur të shfrytëzojë potencialin e lojtarëve dhe të rikthejë Dukagjinin në garën për titull.
