Dy ushtarë të Ushtrisë Amerikane dhe një përkthyes civil janë vrarë në një sulm në Siri të shtunën, sipas Departamentit Amerikan të Mbrojtjes.
Tre persona të tjerë mbetën të plagosur nga sulmi, bëri të ditur Sean Parnell, zëdhënësi kryesor i Pentagonit, përmes një deklarate në platformën X.
“Sulmi ndodhi ndërsa ushtarët po kryenin një angazhim kyç me udhëheqës lokalë. Misioni i tyre ishte në mbështetje të operacioneve të vazhdueshme kundër ISIS-it dhe terrorizmit në rajon”, shkroi Parnell, duke shtuar se identiteti i të vrarëve nuk do të bëhet publik derisa të njoftohen familjarët e tyre.
Sekretari i Mbrojtjes, Pete Hegseth, deklaroi se sulmuesi u neutralizua nga forcat partnere.
“Le të jetë e qartë: nëse shënjestroni amerikanët – kudo në botë – do ta kaloni pjesën tjetër të jetës suaj të shkurtër duke e ditur se Shtetet e Bashkuara do t’ju ndjekin, do t’ju gjejnë dhe do t’ju vrasin pa mëshirë”, shkroi ai në X.
Lajmi u raportua nga CNN.
