Përshkallëzimi i sulmeve ruse në Ukrainë ka ndikuar drejtpërdrejt edhe në masat e sigurisë në Poloni. Autoritetet polake njoftuan se aeroportet e Rzeszow dhe Lublin, të vendosura në juglindje të vendit, janë mbyllur përkohësisht, pas ngritjes së avionëve të Forcave Ajrore Polake.
Sipas Shërbimit të Navigimit Ajror Polak, vendimi u mor për arsye sigurie, në kuadër të reagimit ndaj aktivitetit të shtuar ushtarak rus në rajon. Ndërkohë, Komanda Operacionale e Forcave të Armatosura Polake bëri të ditur se avionë luftarakë janë aktivizuar si masë parandaluese ndaj një sulmi të mundshëm raketor që mund të kërcënonte edhe hapësirën ajrore polake.
Autoritetet ushtarake theksuan se, përveç avionëve luftarakë, janë vënë në gatishmëri edhe sistemet kundërajrore si dhe radarët tokësorë të zbulimit. Sipas deklaratës zyrtare, këto veprime kanë karakter parandalues dhe synojnë garantimin e sigurisë kombëtare, veçanërisht në zonat pranë kufirit me Ukrainën.
Komanda Operacionale konfirmoi se situata po monitorohet në vazhdimësi dhe se forcat polake mbeten të përgatitura për të reaguar në çdo moment, në varësi të zhvillimeve të mëtejshme në rajon.
