Rreth 40 persona kanë humbur jetën dhe të paktën 115 të tjerë janë plagosur, shumë prej tyre në gjendje të rëndë, si pasojë e një zjarri të fuqishëm, bëjnë të ditur autoritetet policore. Lajmi u konfirmua gjatë një konference për shtyp nga komandanti i policisë, Frédéric Gisler.
Sipas tij, prioriteti kryesor në ditët në vijim është identifikimi i viktimave, me qëllim që trupat e pajetë t’u kthehen sa më shpejt familjeve të tyre. Gisler theksoi gjithashtu se mes viktimave pritet të ketë edhe shtetas të huaj.
“Jemi në kontakt të vazhdueshëm me familjarët e viktimave dhe po i informojmë ata në kohë reale për çdo zhvillim,” deklaroi Gisler, duke nënvizuar angazhimin e autoriteteve për transparencë dhe mbështetje ndaj të prekurve.
Më pas, fjalën e mori prokurorja e përgjithshme, Beatrice Pilloud, e cila sqaroi se hetimet për zbardhjen e shkaqeve të zjarrit janë ende në fazë fillestare. “Puna do të marrë kohë,” paralajmëroi ajo, duke shtuar se janë duke u shqyrtuar disa hipoteza.
Sipas Pilloud, teoria më e favorizuar deri më tani është ajo e një “zjarri të përgjithshëm që çoi në përhapje masive të flakëve”. Ajo bëri të ditur se janë marrë në pyetje shumë dëshmitarë dhe se telefonat e gjetur në vendngjarje do t’i nënshtrohen analizës.
Instituti i Mjekësisë Ligjore në Cyrih ka marrë tashmë mandatin për të kryer një hetim të thelluar me qëllim përcaktimin e saktë të shkakut të zjarrit. Autoritetet premtojnë se do të informojnë publikun sapo të ketë rezultate konkrete nga hetimet.
