Lëvizja Vetëvendosje ka marrë më shumë se 51 për qind të votave në zgjedhjet e 28 dhjetorit, pas procesimit të të gjitha votave. Për herë të parë, një parti në Kosovë ka marrë 486.994 vota. LVV-ja e Albin Kurtit mori saktësisht 51,11 për qind, duke siguruar 57 ulëse në Kuvend. Asaj i mjafton bashkëpunimi me partitë e komuniteteve pakicë për të siguruar shumicën e nevojshme prej 61 deputetësh për të krijuar Qeverinë.
VV-ja ishte partia e vetme që shënoi rritje në Kuvend në raport me zgjedhjet e 9 shkurtit, të cilat nuk sollën qeveri të re. Atëkohë pati siguruar 48 ulëse.
Partia Demokratike e Kosovës doli e dyta me 22 ulëse. Ajo mori 20,19 për qind të votave. Në krahasim me zgjedhjet e shkuara, ato të 9 shkurtit, kjo parti humbi dy ulëse në Kuvend.
Lidhja Demokratike e Kosovës ishte humbësja më e madhe e zgjedhjeve të 28 dhjetorit. Kjo parti ka rënë në 15 ulëse nga 20 sa kishte, duke marrë 13,23 për qind të votave.
Në Kuvend, gjashtë ulëse i ka siguruar Aleanca për Ardhmërinë e Kosovës me 5,5 për qind të votave.
Lista Serbe me 9 ulëse dhe Za Zlobodu, Pravdu i Opstanak me një ulëse përmbushin normën prej 10 ulëseve të rezervuara për komunitetin serb. Dhjetë ulëset për komunitetet e tjera janë siguruar nga Kosova Demokratik Turk Partisi me dy ulëse, si dhe nga Vakat, Nova Demokratska Stranka, Iniciativa e Re Demokratike e Kosovës, Socijaldemokratska Unija, Partia Liberale Egjiptiane, PSA, Jedinstvena Goranska Partija dhe Lëvizja Përparimtare e Romëve të Kosovës, secila me nga një ulëse.
Në mesin e dhjetë kandidatëve më të votuar, nëntë janë nga VV-ja. Albin Kurti, me më shumë se 404 mijë vota, u bë personi më i votuar në historinë e Kosovës. Glauk Konjufca i VV-së doli i dyti me më shumë se 318 mijë vota. Personi i tretë më i votuar në këto zgjedhje ishte Albulena Haxhiu me më shumë se 174 mijë vota. I katërti doli Hekuran Murati me më shumë se 171 mijë vota.
Bedri Hamza, kryetar i PDK-së, ishte i vetmi në top-dhjetëshe që nuk vjen nga VV-ja. Ai ka marrë më shumë se 161 mijë vota dhe ishte personi i pestë më i votuar më 28 dhjetor. Top-dhjetëshen e mbyllin Donika Gërvalla-Schwarz, Xhelal Sveçla, Hajrulla Çeku, Avni Dehari dhe Mimoza Kusari-Lila.
Pas numërimit të këtyre votave, zëdhënësi i Komisionit Qendror të Zgjedhjeve, Valmir Elezi, ka thënë se KQZ-ja është e gatshme t’i shpallë rezultatet përfundimtare. Por, sipas ligjit, palët mund të ankohen për administrimin e numërimit të votave brenda 48 orëve nga ndodhja e shkeljes së supozuar. Në këtë rast, PDK-ja është ankuar për një pjesë të votave me postë, duke thënë se ato kanë ardhur pas afatit të ligjshëm.
