Presidenti i Shteteve të Bashkuara, Donald Trump, deklaroi të dielën se ka në plan të bisedojë me miliarderin Elon Musk për mundësinë e rivendosjes së internetit në Iran, ku autoritetet kanë ndërprerë shërbimet për katër ditë rresht për shkak të protestave të vazhdueshme kundër qeverisë.
“Ai është shumë i aftë në këtë fushë dhe ka një kompani shumë të mirë”, u shpreh Trump para gazetarëve, duke iu përgjigjur një pyetjeje nëse do të angazhohej me SpaceX, kompania e Musk që ofron shërbimin satelitor të internetit Starlink, i cili është përdorur edhe në Iran. Ndërkohë, Musk dhe SpaceX nuk kanë dhënë ende një koment zyrtar lidhur me këtë çështje.
Qarkullimi i informacionit nga Irani është kufizuar që nga e enjtja, pas ndërprerjes së internetit në mes të protestave antiqeveritare që kanë vazhduar prej vitit 2022. Trump dhe Musk kanë pasur një marrëdhënie të afërt, veçanërisht pasi Musk kontribuoi financiarisht në fushatën presidenciale fituese të Trump dhe më pas u angazhua në ristrukturimin e qeverisë federale.
Megjithëse dyshja patën një përplasje publike vitin e kaluar për shkak të kundërshtimeve të Musk ndaj projektligjit të taksave të Trump, marrëdhënia mes tyre duket se është përmirësuar sërish. Ata u panë së fundmi duke darkuar bashkë në resortin Mar-a-Lago, ndërsa Sekretari i Mbrojtjes, Pete Hegseth, ka planifikuar të vizitojë një objekt të SpaceX në Teksas.
Musk ka shprehur mbështetje për ofrimin e shërbimit Starlink për qytetarët iranianë, me synimin për t’i ndihmuar ata të kapërcejnë kufizimet e vendosura nga qeveria, një qëndrim që e ka mbajtur edhe gjatë protestave të vitit 2022 pas vdekjes së Mahsa Amini. Shërbimi Starlink është përdorur edhe në zona të tjera të përfshira nga konflikte, përfshirë Ukrainën, ku sipas Reuters, Musk në vitin 2022 urdhëroi ndërprerjen e përkohshme të shërbimit gjatë një ofensive të rëndësishme ushtarake.
