Robotët shtëpiakë, të cilët për dekada kanë qenë pjesë e fantashkencës, po afrohen gjithnjë e më shumë me realitetin. Falë përparimeve në inteligjencën artificiale, këtë vit pritet që robotët e parë shtëpiakë me funksione të shumëfishta të hyjnë në disa familje, kryesisht në Shtetet e Bashkuara.
Në Silicon Valley, kompani të reja teknologjike po trajnojnë robotë për të kryer punë të përditshme si palosja e rrobave, pastrimi, mbushja e lavastoviljes apo sistemimi i shtëpisë. Megjithatë, pavarësisht premtimeve optimiste, këta robotë nuk janë ende plotësisht të pavarur.
Gjatë testimeve, robotë si Eggie nga Tangible AI dhe NEO nga kompania 1X arritën të kryejnë disa detyra shtëpiake, por me lëvizje të ngadalta dhe shpesh me ndihmën e operatorëve njerëzorë në distancë, një fakt që rrallë përmendet në videot promovuese.
Sipas drejtuesve të kompanive, kontrolli njerëzor përdoret për të trajnuar inteligjencën artificiale dhe për të mbledhur të dhëna nga mjedise reale shtëpiake, të cilat janë shumë më komplekse sesa ambientet industriale.
Robotët shtëpiakë aktualisht janë të shtrenjtë dhe të destinuar për një grup të kufizuar përdoruesish. Roboti NEO, për shembull, pritet të kushtojë rreth 20 mijë dollarë ose 500 dollarë në muaj. Kompanitë pranojnë se klientët e parë duhet të jenë të duruar dhe të gatshëm të pranojnë ndërhyrje njerëzore dhe sfida privatësie.
Ndërkohë, start-up-e të tjera po testojnë zgjidhje më të specializuara. Në San Francisko, robotë Isaac po përdoren për palosjen e rrobave në lavanderi, ndërsa kompani të tjera po fokusohen në zhvillimin e “trurit” të robotëve, pa prodhuar vetë pajisjen fizike.
Industria e robotëve humanoidë po tërheq investime miliardëshe dhe konkurrenca po rritet, veçanërisht nga Kina. Megjithatë, sipas Federatës Ndërkombëtare të Robotikës, mund të duhen deri në 20 vjet që robotët shtëpiakë të bëhen vërtet të dobishëm dhe të përhapur gjerësisht.
Pavarësisht skepticizmit, kompanitë teknologjike mbeten të bindura se robotët do të bëhen pjesë e jetës së përditshme, duke ndryshuar mënyrën se si njerëzit e menaxhojnë punët e shtëpisë.
