Komandanti i misionit të KFOR-it të udhëhequr nga NATO, gjeneralmajor Özkan Ulutaş, ka pritur në takim përfaqësuesin special të Bashkimit Evropian për dialogun Beograd–Prishtinë, z. Peter Sørensen.
Lajmi është bërë i ditur nga KFOR-i përmes një njoftimi në Facebook, ku thuhet se takimi u zhvillua në selinë e KFOR-it në Camp Film City, në Prishtinë.
Gjatë takimit, gjeneralmajor Ulutaş theksoi bashkëpunimin e vazhdueshëm dhe të ngushtë të KFOR-it me misionin e Bashkimit Evropian për Sundimin e Ligjit në Kosovë (EULEX), si dhe mbështetjen e plotë ndaj dialogut të lehtësuar nga BE-ja për normalizimin e marrëdhënieve ndërmjet Prishtinës dhe Beogradit.
Sipas KFOR-it, dialogu i ndërmjetësuar nga Bashkimi Evropian mbetet kyç për arritjen e një sigurie të qëndrueshme në Kosovë dhe për stabilitetin rajonal, në dobi të të gjitha komuniteteve që jetojnë në vend.
Në njoftim gjithashtu rikujtohet se KFOR-i vazhdon të zbatojë mandatin e tij, të bazuar në Rezolutën 1244 të Këshillit të Sigurimit të Kombeve të Bashkuara të vitit 1999, me qëllim të garantimit të një mjedisi të sigurt për të gjithë qytetarët e Kosovës dhe sigurimin e lirisë së lëvizjes në çdo kohë.
KFOR-i thekson se vepron në koordinim të ngushtë me Policinë e Kosovës dhe EULEX-in, në përputhje me rolet e tyre përkatëse si reagues të sigurisë, për të ruajtur paqen dhe stabilitetin në vend.
