Presidentja e Kosovës, Vjosa Osmani, bashkë me familjen e ish-Presidentit të Kosovës, Ibrahim Rugova, kanë bërë homazhe tek varri i tij në Velani, në 20-vjetorin e vdekjes së tij. Ajo tha se Rugova e bëri bashkë gjithë popullin e Kosovës rreth kauzës për liri, pavarësi dhe demokraci – një kauzë që akoma është gjallë, raporton Ekonomia Online.
“Sot është 20-vjetori i shkuarjes në amshim të atit themeltar të Republikës së Kosovës, arkitektit të pavarësisë, njeriut që i dha gjithçka Republikës sonë dhe ndërtoi vizionin për të ecur përpara edhe për brezat që do të vijnë pas nesh. Presidenti Rugova e bëri bashkë gjithë popullin e Kosovës rreth kauzës për liri, pavarësi dhe demokraci. Kauza kjo është akoma e gjallë dhe është jetësuar për shkak të sakrificës së madhe të popullit tonë, luftës sonë çlirimtare dhe ndërtimit të aleancave me aleatët tanë strategjik brenda familjes euroatlantike – aleanca këto që i ndërtoi presidenti Rugova me një vizion të pashoq, vizion që sot mbetet dritë udhërrëfyesi për çdo qytetar që e do Kosovën akoma më të fortë dhe të integruar në strukturat euroatlantike. Nderimi për presidentin Rugova do të jetë i përjetshëm, dhe vizioni i tij do të rrojë për aq kohë sa do të rrojë Kosova”, tha Osmani.
Ndërsa bashkëshortja e Rugovës, Fana Rugova, falënderoi Osmanin:
“Faleminderit presidentes Osmani për këtë ceremoni që organizoi në nder të presidentit historik të Kosovës, Ibrahim Rugova. Faleminderit shumë për të gjitha këto aktivitete”, tha ajo.
