Platforma qytetare “Liria ka Emër” ka njoftuar se ka siguruar lejen zyrtare nga Komuna e Prishtinës për shfrytëzimin e hapësirës publike, me qëllim organizimin e marshit qytetar me moton “Drejtësi, jo politikë!”.
Sipas njoftimit, marshit do t’i jepet jetë më 17 shkurt, duke filluar nga ora 14:00, në hapësirën publike të miratuar nga autoritetet komunale. Aktiviteti do të zhvillohet në përputhje të plotë me kërkesën e paraqitur nga organizatorët dhe në harmoni me legjislacionin në fuqi.
Në dokumentin zyrtar të lëshuar nga Komuna e Prishtinës thuhet se leja është dhënë për orarin e kërkuar, duke garantuar kështu zhvillimin e marshit në mënyrë paqësore dhe të rregullt.
Platforma “Liria ka Emër” u ka bërë thirrje qytetarëve të Prishtinës dhe mbarë Kosovës që t’i bashkohen këtij marshit paqësor, si shprehje e kërkesës për drejtësi të paanshme për ish-krerët e Ushtrisë Çlirimtare të Kosovës, të cilët ndodhen në paraburgim në Hagë prej më shumë se pesë vitesh.
Sipas organizatorëve, marshit synon të jetë një thirrje qytetare për respektimin e parimeve të drejtësisë, dinjitetit njerëzor dhe për ndarjen e qartë të drejtësisë nga politika.
