Kryeministri i Shqipërisë, Edi Rama, e ka përmbyllur fjalimin e tij në parlamentin izraelit, Knesset, me një thirrje të fortë për paqe dhe ndaljen e akteve të dhunës mes izraelitëve dhe palestinezëve, duke shprehur shpresën për një epokë të re të marrëdhënieve mes dy popujve dhe për stabilitet në Lindjen e Mesme.
Në fund të adresimit të tij, Rama theksoi nevojën për dialog dhe bashkëjetesë, duke iu referuar figurave që kanë sakrifikuar jetën për idealin e paqes. Ai nënvizoi se vetëm përmes mirëkuptimit dhe respektit reciprok mund të ndërtohet një e ardhme e qëndrueshme për rajonin.
“Me fjalët e një martiri arab për paqen dhe me fjalët e një martiri hebre për paqen, dua ta mbyll këtë fjalë. Ju bëjmë thirrje të gjithë izraelitëve kudo që jetojnë, hebrenjve dhe palestinezëve, që të bëjnë paqe dhe të ecin drejt një rruge të re për paqen. Palestinezët të jetojnë me dinjitet në vendin e tyre. Dy kombet qofshin bashkë për njerëzimin dhe paqen,” deklaroi Rama.
Mesazhi i kryeministrit shqiptar u prit si një apel për ndaljen e dhunës dhe për forcimin e përpjekjeve ndërkombëtare në funksion të paqes, duke vënë theksin te dinjiteti njerëzor dhe bashkëjetesa si vlera universale.
