Policia në periferi të Minneapolis arrestoi rreth 26 persona gjatë një proteste të zhvilluar mbrëmjen e së hënës jashtë hotelit SpringHill Suites by Marriott, ku demonstruesit dyshonin se po qëndronte komandanti i ICE-së, Gregory Bovino. Sipas autoriteteve, protesta nisi si paqësore, por u shpall mbledhje e paligjshme pasi një pjesë e protestuesve u përfshi në sjellje të dhunshme, duke hedhur objekte në drejtim të forcave të rendit dhe duke shkaktuar dëme materiale në zonën përreth hotelit.
Policia njoftoi se protestuesit u paralajmëruan disa herë të shpërndaheshin, por arrestimet u kryen ndaj atyre që refuzuan të largoheshin ose që dyshohet se kryen vepra penale gjatë ndërhyrjes së policisë. Demonstruesit mbanin pankarta dhe përdorën daulle, tenxhere dhe mjete të tjera për të krijuar zhurmë, ndërsa në disa momente pati përplasje fizike me oficerët.
Autoritetet nuk kanë konfirmuar zyrtarisht nëse Gregory Bovino ndodhej në hotel në momentin e protestës. Ngjarja vjen në një periudhë tensioni të lartë në Minneapolis, pas vrasjes së Alex Pretti, një infermier i qëlluar për vdekje nga agjentë federalë të emigracionit gjatë një operacioni, ngjarje që ka nxitur protesta të shumta dhe reagime të forta kundër veprimeve të ICE-së dhe pranisë së agjencive federale në qytet.
Zyrtarët lokalë kanë bërë thirrje për qetësi, ndërsa situata mbetet e ndjeshme dhe protestat kundër politikave të emigracionit dhe përdorimit të forcës nga autoritetet federale pritet të vazhdojnë.
