Presidenti i Shteteve të Bashkuara, Donald Trump, ka deklaruar të mërkurën se një “armadë e madhe” amerikane është në rrugë drejt Iranit, duke i bërë thirrje qeverisë së Teheranit të ulet në tryezën e negociatave për një marrëveshje të drejtë dhe të barabartë, që përjashton armët bërthamore. Trump njoftoi këtë përmes një postimi në platformën e tij sociale, duke paralajmëruar se “koha po mbaron” dhe nënvizuar gatishmërinë e SHBA-së për të përdorur forcën nëse është e nevojshme.
Sipas postimit të tij, flota ushtarake — më e madhja e dërguar ndonjëherë drejt një lëvizjeje të tillë krahasuar edhe me atë të dërguar më parë në Venezuelë — është e përgatitur “të përmbushë misionin me shpejtësi dhe, nëse duhet, me dhunë”. Trump theksoi se ShBA pret që Irani të ulet në bisedime mbi programin e tij bërthamor dhe të arrijë një marrëveshje që është e pranueshme për të gjithë palët.
Ai gjithashtu iu referua një operacioni ushtarak të mëparshëm — të quajtur “Operacioni Midnight Hammer” — duke paralajmëruar se një sulm i ardhshëm do të ishte “shumë më i keq” nëse negociatat dështojnë.
Deklarata e presidentit amerikan vjen në një kohë të tensionuar në rajon, ndërsa Irani ka bërë të ditur publikisht se nuk ka kërkuar negociata nën presion ushtarak dhe ka paralajmëruar se çdo sulm do të shkaktojë “përgjigje të shpejtë dhe gjithëpërfshirëse”.
Reagimet ndërkombëtare janë të kujdesshme, me disa vende që bëjnë thirrje për de-eskalim dhe rifillim të dialogut diplomatik me shumicë fokusuar në uljen e tensioneve dhe shmangien e konfliktit të armatosur mes dy fuqive të mëdha globale./ A News
