Bashkimi Evropian pritet me shumë gjasë ta përfshijë Gardën Revolucionare Islamike të Iranit (IRGC) në listën e organizatave terroriste. Lajmi u bë i ditur të enjten nga përfaqësuesja e lartë e BE-së për politikë të jashtme dhe siguri, Kaja Kallas, në prag të mbledhjes së Këshillit të Ministrave të Punëve të Jashtme në Bruksel, raporton Radio Evropa e Lirë.
“Po vendosim sanksione të reja ndaj Iranit dhe pres gjithashtu që ta fusim Gardën Revolucionare Islamike në listën e organizatave terroriste”, deklaroi Kallas para gazetarëve. Ajo theksoi se “nëse vepron si terrorist, duhet të trajtohesh si terrorist”.
Sipas saj, ky vendim do ta vendoste Gardën Revolucionare në të njëjtin nivel me organizata xhihadiste si Al-Kaeda dhe Shteti Islamik, duke i dërguar Teheranit një mesazh të fortë politik dhe diplomatik.
Hapi vjen në një kohë kur Bashkimi Evropian po ashpërson qëndrimin ndaj Iranit për shkak të shtypjes së dhunshme të protestave masive që kanë tronditur vendin. Blloku prej 27 shtetesh pritet të miratojë gjithashtu sanksione shtesë, përfshirë ndalim vizash dhe ngrirje asetesh për 21 entitete shtetërore dhe zyrtarë iranianë, mes tyre edhe ministrin e Brendshëm, për shkak të rolit të tyre në represionin e protestave.
Autoritetet iraniane kanë pranuar se mbi 3.000 persona janë vrarë gjatë protestave, duke pretenduar se shumica e viktimave ishin pjesëtarë të forcave të sigurisë ose kalimtarë të vrarë nga “protestuesit trazues”. Megjithatë, organizatat ndërkombëtare për të drejtat e njeriut e kundërshtojnë këtë version, duke pohuar se numri i viktimave është shumë më i lartë dhe mund të arrijë në dhjetëra mijëra. Sipas tyre, shumica e protestuesve janë vrarë nga forcat e sigurisë, përfshirë Gardën Revolucionare, e cila dyshohet se ka qëlluar drejtpërdrejt mbi turmat.
Garda Revolucionare Islamike është krahu ideologjik i ushtrisë iraniane dhe u krijua pas Revolucionit Islamik të vitit 1979 për të mbrojtur udhëheqjen klerikale të vendit. Ajo ka ndikim të gjerë në jetën politike dhe ekonomike të Iranit, duke kontrolluar ose zotëruar kompani në sektorë kyç të ekonomisë.
Kallas theksoi se, pavarësisht këtij vendimi të mundshëm, kanalet diplomatike me Iranin pritet të mbeten të hapura. IRGC-ja pritet të përfshihet në listën e zezë të BE-së edhe pas ndryshimit të qëndrimit nga disa shtete anëtare, përfshirë Francën dhe Italinë, të cilat më herët kishin shprehur rezerva.
Ministri i Jashtëm francez, Jean-Noel Barrot, deklaroi në Bruksel se “nuk mund të ketë pandëshkueshmëri për krimet e kryera”, duke sinjalizuar mbështetjen e Parisit për këtë hap.
Bashkimi Evropian ka vendosur tashmë sanksione ndaj qindra zyrtarëve dhe entiteteve iraniane, si për shtypjen e protestave ashtu edhe për mbështetjen e Teheranit ndaj luftës së Rusisë në Ukrainë. Megjithatë, IRGC-ja dhe komandantët e saj të lartë janë tashmë nën sanksione, çka bën që shpallja e saj organizatë terroriste të ketë kryesisht një peshë politike dhe simbolike.
