Paneli i Gjykatës së Apelit të Dhomave të Specializuara të Kosovës (DHSK) ka refuzuar apelin e ish-ushtarit Pjetër Shala kundër urdhrin për zhdëmtim, duke lënë në fuqi vendimin e Trupit Gjykues që e detyron atë të paguajë 208,000 euro kompensim për viktimat e tij.
Vendimi u mor nga gjykatësit Mishelë Pikar, Kai Ambos dhe Nina Jorgensen, dhe shënon vendimin e parë të Panelit të Apelit mbi çështjet e zhdëmtimit në DHSK.
Shala, i shpallur fajtor për krime lufte, përfshirë ndalimin arbitrar, torturën dhe vrasjen e paligjshme, kishte apeluar vendimin e Trupit Gjykues, duke ngritur pesë pika kryesore: interpretimin e ligjit të shkakësisë, vlerësimin e dëmit material të viktimave, proporcionin e shumës së kompensimit me rolin e tij në krime, si dhe procesin e shqyrtimit të zhdëmtimit para vendimit për fajësi dhe dënim.
Paneli i Apelit rrëzoi të gjitha argumentet e Shalës, duke konstatuar se Trupi Gjykues nuk kishte gabuar në interpretimin e ligjit ose vlerësimin e provave. Gjykata vuri në dukje gjithashtu se kërkesa për pezullimin e shqyrtimit të urdhrit për zhdëmtim ishte e tejkaluar, pasi aktgjykimi për apelimin mbi fajësinë ishte lëshuar më 14 korrik 2025.
Në vendimin e tij, Paneli theksoi se Shala kishte pasur mundësi të apelonte urdhrin për zhdëmtim dhe se shqyrtimi nga Apeli nuk e kishte cenuar të drejtën e tij për një procedim të drejtë dhe të shpejtë.
Me këtë vendim, viktimat e tetë personave që morën pjesë në proces do të përfitojnë kompensimin për dëmet fizike, mendore dhe materiale të pësuara gjatë konfliktit.
