Italia është vënë në alarm të lartë sigurie vetëm dy ditë para ceremonisë zyrtare të hapjes së Lojërave Olimpike Dimërore 2026, pas një serie sulmesh kibernetike që kishin në shënjestër institucionet shtetërore dhe infrastrukturën digjitale të vetë eventit olimpik.
Ministri i Jashtëm italian, Antonio Tajani, bëri të ditur se sistemet e sigurisë kibernetike funksionuan me sukses, duke neutralizuar sulmet pa shkaktuar dëme serioze apo ndërprerje të shërbimeve. Sipas tij, objektivat kryesore ishin faqet zyrtare të Lojërave Olimpike dhe platformat digjitale të disa institucioneve qeveritare.
Autoritetet italiane kanë deklaruar se, bazuar në hetimet paraprake, sulmet dyshohet se kanë origjinën nga Rusia dhe kishin për qëllim destabilizimin e infrastrukturës teknologjike të një prej ngjarjeve më të rëndësishme sportive në botë.
Ndër objektivat e prekura janë raportuar faqe të ndryshme të Ministrisë së Jashtme, si edhe sisteme informatike të hoteleve në zonën e Cortina d’Ampezzo, ku do të zhvillohen një pjesë e garave olimpike. Megjithatë, autoritetet theksojnë se aktiviteti sportiv nuk është vënë në rrezik.
Ngjarja zhvillohet në një klimë të ndjeshme politike, pasi Rusia merr pjesë në këto Lojëra me një delegacion shumë të kufizuar dhe nën flamur neutral. Përvoja e sulmeve kibernetike gjatë Lojërave Olimpike të Parisit 2024 ka shërbyer si një paralajmërim për Italinë, e cila ka investuar ndjeshëm në forcimin e mbrojtjes digjitale për këtë edicion dimëror.
Autoritetet italiane kanë bërë të ditur se masat e sigurisë do të mbeten në nivel maksimal deri në përfundimin zyrtar të Lojërave Olimpike më 22 shkurt, duke garantuar se mbrojtja e sportistëve, delegacioneve dhe infrastrukturës mbetet prioritet absolut.
