Kryetari i Aleancës për Ardhmërinë e Kosovës (AAK), Ramush Haradinaj, ka njoftuar se, me ftesë të Presidentes së Republikës së Kosovës, Vjosa Osmani, ka zhvilluar një diskutim lidhur me Bordin e Paqes, si dhe për zhvillimet politike në vend dhe në rajon.
Haradinaj ka bërë të ditur se gjatë takimit i ka shprehur Presidentes Osmani vlerësimin për pjesëmarrjen e Kosovës në Bordin e Paqes, me ftesë të Presidentit të Shteteve të Bashkuara të Amerikës, Donald J. Trump.
“Presidentes Osmani i shpreha vlerësimin për pjesëmarrjen e Kosovës në Bordin e Paqes, me ftesë të Presidentit Donald J. Trump”, ka shkruar Haradinaj.
Ai ka theksuar rëndësinë e veçantë që ka partneriteti me Shtetet e Bashkuara të Amerikës për Kosovën, duke nënvizuar se çdo bashkëpunim në iniciativa të përbashkëta është jetik për vendin.
“Çdo partneritet me Shtetet e Bashkuara të Amerikës, në çdo iniciativë ku jemi krah njëri-tjetrit, është i rëndësisë së veçantë për Kosovën”, ka deklaruar Haradinaj.
Sipas tij, Aleanca për Ardhmërinë e Kosovës e mbështet pa asnjë hezitim këtë angazhim institucional.
