Sindikata e Bashkuar e Arsimit, Shkencës dhe Kulturës (SBASHK) u ka drejtuar një paralajmërim të ashpër institucioneve të drejtësisë, duke kërkuar lirimin e menjëhershëm të mësimdhënësit Abaz Kadriu. Në të kundërtën, sindikata ka bërë të ditur se do të ndërmarrë veprime sindikale më të ashpra, deri në grevë të përgjithshme në nivel vendi.
Si shenjë proteste ndaj arrestimit të kolegut të tyre, kolektivi i shkollës fillore të mesme të ulët “Pavarësia” në Prishtinë pezulloi procesin mësimor për dy orë gjatë mëngjesit të së martës. Mësimdhënësi Abaz Kadriu ishte ndaluar një ditë më parë për 48 orë, nën dyshimin për “sulm fizik”.
I pranishëm në grevë, përfaqësuesi i SBASHK-ut, Ymer Ymeri, deklaroi se versioni i prezantuar nga autoritetet nuk përkon me realitetin në terren. Sipas tij, Kadriu nuk ka qenë agresor, por viktimë e një sulmi në vendin e punës.
“Mësimdhënësi Kadriu është sulmuar brenda ambienteve shkollore. Fatkeqësisht, kjo nuk është hera e parë që ndodhin raste të tilla. Ka pasur edhe më herët sulme fizike ndaj mësimdhënësve, madje edhe nga prindër,” theksoi Ymeri.
SBASHK-u ka kërkuar nga organet e drejtësisë që të veprojnë me urgjencë për zbardhjen e plotë të rastit. Kërkesat kryesore të sindikatës përfshijnë heqjen e masës së ndalimit për mësimdhënësin Kadriu, ndërmarrjen e masave ligjore ndaj prindërve që, sipas sindikatës, nxisin ose tolerojnë sjellje agresive ndaj stafit arsimor, si dhe garantimin e një mbrojtjeje më të madhe institucionale për mësimdhënësit.
Ymeri paralajmëroi se durimi i SBASHK-ut është drejt fundit dhe se mungesa e një reagimi të shpejtë nga prokuroria mund të sjellë përshkallëzim të protestave.
“Nëse rastet nuk sqarohen me shpejtësi dhe mësimdhënësit nuk lirohen, kjo formë e veprimit sindikal mund të zgjerohet dhe të çojë në bllokim të plotë të sistemit arsimor në gjithë vendin,” tha ai.
SBASHK-u thekson se siguria dhe dinjiteti i mësimdhënësve janë të panegociueshme dhe se institucionet duhet të japin përgjigje konkrete për të parandaluar përsëritjen e rasteve të tilla.
