Shtetet e Bashkuara po përgatiten për një fushatë ushtarake kundër Iranit, e cila sipas agjencisë Reuters mund të zgjasë javë me radhë. Plani i ri amerikan nuk përqendrohet vetëm tek objektivat bërthamore dhe raketore, por gjithashtu synon ndërtesat qeveritare dhe institucionet e administratës, duke synuar potencialisht dobësimin e regjimit të ajatollahëve.
Ky zhvillim vjen pas dështimit të raundit të gjashtë të bisedimeve në Muskat më 6 shkurt, i pari pas “Luftës 12-ditore” të vitit të kaluar, ku palët nuk arritën të gjenin një gjuhë të përbashkët.
Si shenjë përshkallëzimi, Shtetet e Bashkuara kanë dërguar drejt rajonit aeroplanmbajtësen e dytë USS Gerald Ford. Gjatë një takimi me trupat ushtarake, Presidenti Donald Trump shprehu skepticizmin se një zgjidhje diplomatike mund të arrihet:
“Ata kanë qenë shumë të vështirë për arritjen e një marrëveshjeje me Iranin. Ndonjëherë duhet të kesh frikë. Kjo është e vetmja gjë që me të vërtetë do ta zgjidhë situatën”.
Zyrtarët e Shtëpisë së Bardhë theksuan se Trump ka të gjitha opsionet mbi tavolinë, ndërsa raundi i shtatë i bisedimeve është planifikuar më 17 shkurt në Gjenevë.
Thelbi i përplasjes mbetet i pandryshuar: Uashingtoni dhe Tel Avivi kërkojnë që Irani të ndalë zhvillimin e raketave balistike, të cilat, në kombinim me programin bërthamor, mund t’i japin Teheranit aftësinë për të prodhuar armë atomike. Irani, megjithatë, refuzon kategorikisht këtë kërkesë, duke e cilësuar arsenalin e tij si mjet mbrojtës pas pasojave të konfliktit të vitit 2025.
