Ish-kryenegociatorja e Kosovës, Edita Tahiri, ka reaguar ndaj idesë së bërë publike nga Edi Rama dhe Aleksandar Vuciq për integrimin e Shqipërisë dhe Serbisë në tregun evropian, por jo edhe për integrimin politik në Bashkimin Evropian.
Në një postim publik, Tahiri shprehet se për Vuciqin është e qartë pse dëshiron t’i shmanget integrimit politik të Serbisë në BE. Ajo thekson se Serbia e ka kusht njohjen e shtetit të Kosovës përmes Kapitullit 35, me të cilin është kushtëzuar nga BE-ja. Sipas saj, Vučić nuk dëshiron as ta zemërojë Rusinë me anëtarësimin e Serbisë në BE.
Por, sipas Tahirit, pyetja që shtrohet është pse Rama do t’i shmangej integrimit politik të Shqipërisë në BE, kur aktualisht Shqipëria konsiderohet më afër BE-së sesa Serbia në procesin integrues.
Ajo vlerëson se një qëndrim i tillë mund të lidhet me shmangien e obligimeve për sundimin e ligjit dhe qeverisjen e pastër, në një kohë kur, sipas saj, korrupsioni në Shqipëri është në rritje.
Tahiri thekson se ditët e fundit Rama ka larguar persona të përfshirë në afera korruptive nga qeveria, duke pretenduar se kjo ka ndodhur si rezultat i presionit nga BE-ja. Sipas saj, mund të vijë një moment kur përgjegjësia politike do të kërkohet në nivelet më të larta të qeverisjes.
