Këshilli i Sigurimit i Kombeve të Bashkuara do të mbajë një seancë emergjente të shtunën, pas sulmeve ajrore të ndërmarra nga SHBA dhe Izraeli ndaj Iranit, të cilat kanë shkaktuar reagime të gjera ndërkombëtare.
Seanca emergjente u kërkua nga misionet e përhershme të Francës, Bahreinit, Kinës, Rusisë dhe Kolumbisë, sipas një deklarate të misionit të përhershëm të Rusisë në OKB, cituar nga Anadoll Agency. Takimi pritet të zhvillohet të shtunën pasdite.
Misioni rus kritikoi veprimet e SHBA-së dhe Izraelit, duke i cilësuar si “veprime të pamatura kundër një shteti sovran anëtar të OKB-së” dhe paralajmëroi se këto “aventura të rrezikshme minojnë paqen, stabilitetin dhe sigurinë në të gjithë rajonin e Lindjes së Mesme”. Deklarata theksoi se Rusia do të kërkojë ndërprerjen e menjëhershme të veprimeve të paligjshme dhe përshkallëzuese, duke i bërë thirrje palëve për një rrugë drejt zgjidhjes diplomatike.
Ky veprim ndërkombëtar vjen pas sulmeve të përbashkëta të SHBA-së dhe Izraelit, të justifikuara si një përpjekje për të neutralizuar “kërcënimet” e regjimit iranian. Kryeministri i Israel, Benjamin Netanyahu, dhe presidenti i SHBA-ve, Donald Trump, publikuan deklarata të ndara në video që aludonin gjithashtu në mbështetje të ndryshimeve në qeverinë e Teheranit.
Nga ana e saj, Irani e quajti sulmin një shkelje të sovranitetit dhe nisi hakmarrje ndaj objektivave të SHBA-së dhe Izraelit, duke theksuar përshkallëzimin e situatës në rajon.
