Presidenti amerikan, Donald Trump, ka deklaruar se Shtetet e Bashkuara janë “shumë përpara parashikimeve kohore” prej katër deri në pesë javësh sa i përket zhvillimeve të fundit ushtarake, por ka theksuar se konflikti mund të zgjasë edhe më gjatë.
Duke folur për mediat, Trump hodhi poshtë pretendimet se synon ta përfundojë situatën “shumë shpejt”, duke shtuar se SHBA-të kanë kapacitetin për të vazhduar operacionet përtej këtij afati.
“Nuk mërzitem, nuk ka asgjë të mërzitshme në lidhje me këtë. Dikush nga media tha: ‘Mendoj se ai do të mërzitet pas një ose dy javësh’… jo, ne nuk mërzitemi. Unë kurrë nuk mërzitem”, u shpreh ai.
Trump deklaroi se vendimi për të goditur Iranin erdhi si rezultat i asaj që ai e cilësoi si mundësia më e mirë për të “eliminuar kërcënimet e patolerueshme të paraqitura nga ky regjim i sëmurë dhe i lig”.
Ai rikujtoi gjithashtu eliminimin e gjeneralit iranian Qasem Soleimani në vitin 2020, gjatë mandatit të tij të parë presidencial. Soleimani ishte oficer i lartë i Islamic Revolutionary Guard Corps.
“Për gati 47 vjet, ky regjim ka sulmuar Shtetet e Bashkuara dhe ka vrarë amerikanë”, deklaroi Trump. Sipas tij, shumë nga sulmet ndaj trupave amerikane janë kryer me bomba rrugore të lidhura me Iranin, për të cilat ai fajësoi Soleimanin.
“Ato u vendosën atje nga gjenerali Soleimani, i cili ishte babai i bombës rrugore – mendonte ai me shumë krenari. Por unë e pushova nga puna në mandatin tim të parë”, përfundoi Trump.
