Nënkryetarja e Kuvendit të Kosovës nga radhët e komuniteteve jo-shumicë, Emilia Rexhepi, ka deklaruar se mundësia e mbajtjes së zgjedhjeve të reja parlamentare do të ishte një proces i kushtueshëm dhe i lodhshëm për qytetarët, duke theksuar se shpresa e saj kishte qenë arritja e një kompromisi politik për formimin e institucioneve.
Në një intervistë në emisionin Info Magazine në Klan Kosova, Rexhepi shpjegoi se situata aktuale politike lidhet me procesin e zgjedhjes së presidentit dhe me interpretimet kushtetuese që po priten nga institucionet përkatëse. Sipas saj, një vendim i qartë nga Gjykata Kushtetuese e Kosovës do të mund të hapte rrugën për formimin e institucioneve të reja.
Ajo theksoi se gjatë një takimi me presidenten e vendit, Vjosa Osmani, ishte diskutuar edhe mundësia e mbajtjes së zgjedhjeve brenda afatit kushtetues prej 45 ditësh, në rast se Kuvendi shpërndahet dhe nuk arrihet marrëveshje për zgjedhjen e presidentit.
Sipas Rexhepit, respektimi i Kushtetutës është i domosdoshëm në çdo skenar politik. Megjithatë, ajo paralajmëroi se dështimi për të zgjedhur presidentin dhe për të formuar institucionet do ta çonte vendin drejt zgjedhjeve të reja, të cilat, sipas saj, do të kishin kosto të lartë financiare dhe politike për vendin dhe do të krijonin lodhje tek qytetarët.
Në këtë kontekst, Rexhepi tha se komunitetet jo-shumicë kishin shpresuar në një marrëveshje politike mes partive kryesore shqiptare, konkretisht mes Lëvizjes Vetëvendosje dhe Partisë Demokratike të Kosovës. Sipas saj, një kompromis i tillë, me mbështetjen edhe të deputetëve të pakicave, do të kishte mundësuar zgjedhjen e presidentit dhe stabilizimin institucional.
Megjithatë, një marrëveshje e tillë nuk u arrit, duke e lënë të hapur mundësinë e një krize institucionale dhe të një procesi të ri zgjedhor, nëse partitë politike nuk gjejnë një zgjidhje për formimin e institucioneve brenda afateve kushtetuese.
