UEFA ka vendosur të mos nisë procedurë disiplinore ndaj futbollistëve të Bayern Munich, Joshua Kimmich dhe Michael Olise, pas kartonëve të verdhë të marrë në ndeshjen e UEFA Champions League, raportoi gazeta sportive franceze L’Équipe.
Sipas raportimeve, dy lojtarët do të mungojnë vetëm në ndeshjen e kthimit të fazës së 1/8-ës së finales kundër Atalantes, për shkak të kartonit të tretë të verdhë në këtë sezon të Ligës së Kampionëve, por nuk do të përballen me ndonjë dënim shtesë nga organet disiplinore të UEFA-s.
Incidenti ndodhi gjatë pjesës së dytë të ndeshjes, kur Olise u ndëshkua me karton të verdhë nga gjyqtari norvegjez Espen Eskås për vonesë në ekzekutimin e një goditjeje nga këndi në minutën e 77-të. Ndërkohë, në minutën e 82-të, Kimmich mori karton të verdhë pasi vonoi ekzekutimin e një goditjeje të lirë, çka shkaktoi reagimin e mesfushorit të Atalantës, Yunus Musah, i cili gjithashtu u ndëshkua me karton.
Megjithatë, sipas raportimeve, në raportin e ndeshjes nuk është evidentuar ndonjë sjellje e dyshimtë nga gjyqtari, ndaj UEFA ka vendosur të mos hapë hetim disiplinor.
Si pasojë, Kimmich dhe Olise do ta shlyejnë pezullimin në ndeshjen e kthimit, ndërsa nëse ekipi gjerman kualifikohet në çerekfinale, ata do të jenë të disponueshëm me një bilanc të pastër kartonësh për përballjen e mundshme me Real Madrid ose Manchester City.
