Ministri i Jashtëm i Rusisë, Sergei Lavrov, ka deklaruar se Bashkimi Evropian i ka vendosur Serbisë dy kushte kryesore për rrugën drejt integrimit evropian: njohjen e pavarësisë së Kosovës dhe bashkimin në vendosjen e sanksioneve kundër Rusisë.
Në një deklaratë të tij, kryediplomati rus theksoi se Brukseli kërkon nga Serbia që të harmonizojë plotësisht politikën e saj të jashtme dhe të sigurisë me atë të BE-së, gjë që sipas tij nënkupton edhe përfshirjen në masat ndëshkuese ndaj Moskës për shkak të luftës në Ukrainë.
Sipas Lavrovit, Moska e ka pyetur Beogradin se si planifikon të veprojë përballë këtyre kërkesave që, sipas tij, përbëjnë dy ultimatumet kryesore të Brukselit në procesin e integrimit evropian.
Ai theksoi se çështja mbetet aktuale dhe e ndjeshme, duke shtuar se burokracia e Brukselit është e vetëdijshme për situatën e ndërlikuar në të cilën ndodhet Serbia, e cila përpiqet të ruajë balancën mes aspiratave për integrim në BE dhe marrëdhënieve tradicionale me Rusinë.
Lavrov shtoi se kërkesat e Bashkimit Evropian që Serbia të mbështesë plotësisht politikat e tyre në fushën e sigurisë dhe të jashtme nënkuptojnë, në praktikë, rreshtimin e Beogradit me qëndrimin e BE-së ndaj luftës në Ukrainë dhe vendosjen e sanksioneve ndaj Rusisë.
Deklarata e shefit të diplomacisë ruse vjen në një kohë kur Serbia vazhdon të përballet me presion diplomatik nga partnerët evropianë për të harmonizuar politikat e saj me ato të Bashkimit Evropian, ndërsa çështja e marrëdhënieve me Kosovën mbetet një nga temat më të ndjeshme në procesin e integrimit evropian të vendit.
