Presidenti i Serbisë, Aleksandar Vuçiq, ka bërë të ditur se qeveria do të ulë akcizat mbi produktet e naftës për 40 për qind, një masë e projektuar për të parandaluar rritjen e çmimeve nëpër pompat e karburanteve.
Situata ka ardhur si pasojë e konfliktit në Lindjen e Mesme, që ka shkaktuar shqetësime të mëdha në zinxhirin e furnizimit me naftë dhe gaz, duke rritur presionin mbi çmimet globale. Vuçiq theksoi se ulja e akcizës synon të garantojë furnizim të bollshëm dhe çmime të qëndrueshme për qytetarët.
“Ne jemi duke hequr dorë pothuajse tërësisht nga të hyrat tona për të zvogëluar ndikimin në buxhetin shtetëror, për aq kohë sa kemi rezerva të mëdha,” deklaroi Vuçiq pas një takimi me Këshillin e Sigurisë Kombëtare. Ai sqaroi se Serbia arkëton rreth 2 miliardë euro nga akciza e naftës, e ardhura më e madhe e shtetit nga taksat e energjisë.
Sipas tij, një javë më parë qeveria kishte ulur akcizën për 20 për qind, që i kushtonte buxhetit rreth 35 milionë euro në muaj. Përpara këtyre masave, taksat shtetërore përbënin më shumë se gjysmën e çmimit të një litri benzinë apo diesel që paguajnë qytetarët. Vuçiq i ka përshkruar masat si “të dhimbshme për shtetin”, por ka garantuar se qytetarët nuk kanë arsye për shqetësim për shkak të rezervave të mjaftueshme.
Një qasje tjetër ka ndodhur në Kosovë, ku Ministria e Industrisë, Ndërmarrësisë dhe Tregtisë ka vendosur masa mbrojtëse për naftën duke kufizuar fitimet maksimale për shitjen me shumicë dhe pakicë. Transporti global përmes Ngushticës së Hormuzit, ku kalon rreth 20 për qind e naftës së lëngshme natyrore, ka rënë ndjeshëm, duke shtuar presionin mbi çmimet ndërkombëtare.
Edhe presidenti i Shteteve të Bashkuara të Amerikës, Donald Trump, ka pranuar se çmimet e naftës do të rriten, por e ka konsideruar këtë një “çmim të vogël” për të eliminuar kërcënimin bërthamor të Iranit.
