Ferit Hoxha, Ministër për Evropën dhe Punët e Jashtme, të Shqipërisë, ka përkujtuar 17-vjetorin e anëtarësimit të Shqipërisë në NATO.
Përmes një postimi në rrjetin social X, ai e cilësoi këtë si një arritje historike, duke theksuar përkushtimin e vendit ndaj mbrojtjes kolektive dhe ruajtjes së paqes.
“Si sot, 17 vjet më parë, Shqipëria hodhi një hap vendimtar drejt së ardhmes së saj duke u bërë anëtare me të drejta të plota në NATO, një moment historik që e ankoroi vendosmërisht rrugëtimin tonë euro-atlantik dhe konsolidoi themelet e sigurisë kombëtare”, ka shkruar Hoxha.
Ai theksoi se Shqipëria ka dëshmuar vazhdimisht se është një aleate e përkushtuar dhe e besueshme.
“Që nga ai moment përcaktues, Shqipëria ka dëshmuar se është një Aleate e përkushtuar dhe e besueshme, duke kontribuar aktivisht në misionet dhe operacionet e NATO-s, si dhe duke promovuar stabilitetin në Ballkanin Perëndimor, përfshirë mbështetjen e vazhdueshme për perspektivën euro-atlantike të Kosovës”, ka thënë ai.
Duke folur për zhvillimet aktuale, Hoxha ka nënvizuar përputhjen e Shqipërisë me prioritetet e Aleancës.
“Sot, Shqipëria është plotësisht e harmonizuar me prioritetet në zhvillim të NATO-s: nga ndarja e drejtë e përgjegjësisë dhe rritja e investimeve në mbrojtje, te forcimi i qëndrueshmërisë, përqafimi i inovacionit dhe avancimi i teknologjive të reja në një mjedis sigurie që ndryshon me shpejtësi”, ka shkruar ai.
Ministri ka shtuar se Samiti i ardhshëm i NATO-s që do të mbahet në Shqipëri, duke e cilësuar si shprehje të besimit ndaj vendit.
“Duke parë drejt së ardhmes, Shqipëria ka nderin të përgatitet për të pritur Samitin e radhës së NATO-s për herë të parë në rajonin tonë. Ky nuk është thjesht një aktivitet; është një shprehje e qartë e besimit në rolin, besueshmërinë dhe kontributin e Shqipërisë brenda Aleancës”, theksoi Hoxha.
Në përfundim, ai ka thënë se vendi do të vijojë të qëndrojë i palëkundur përkrah aleatëve.
“Në një botë gjithnjë e më komplekse dhe të pasigurt, Shqipëria mbetet e palëkundur, e bashkuar me Aleatët, e përkushtuar ndaj mbrojtjes kolektive dhe e dedikuar për ruajtjen e paqes, lirisë dhe vlerave tona të përbashkëta”, ka përfunduar ai.
