Ambasada e Ukrainës në Mal të Zi u ka bërë thirrje partnerëve ndërkombëtarë që të rrisin presionin ndaj Rusisë dhe të forcojnë mbështetjen për mbrojtjen e Ukrainës, duke paralajmëruar se sulmet ruse ndaj civilëve janë intensifikuar gjatë muajve të fundit.
Në një postim në rrjetin social X, ambasada deklaroi se, që nga fillimi i pushtimit rus, miliona njerëz kanë vuajtur pasojat e krimeve ruse – përfshirë vrasjen e civilëve, torturimin dhe ekzekutimin e të burgosurve të luftës, si dhe largimin e fëmijëve ukrainas nga familjet e tyre.
Sipas deklaratës, sulmet ruse kanë shkatërruar lagje të tëra qytetesh dhe qyteza të tëra; në shënjestër kanë qenë gjithashtu spitale, shkolla, universitete, kafene, dyqane dhe kopshte fëmijësh.
“Rusia duhet të marrë një sinjal të qartë se krimet e saj nuk do të mbeten pa u ndëshkuar,” theksoi ambasada, duke u bërë thirrje partnerëve që të sigurojnë pasoja konkrete për veprimet e Rusisë.
