Personi që humbi jetën nga të shtënat me armë zjarri mesditën e së mërkurës, më 18 nëntor, në parkingun e një qendre tregtare në Suharekë, është Sylë Daka, nga fshati Vërëshec, ka raportuar mediumi lokal “Suhareka Express”
Ngjarja e rëndë ndodhi rreth orës 12:03, pas një mosmarrëveshjeje të çastit, ku viktima dyshohet se u qëllua me armë zjarri në prani të bashkëshortes dhe vajzës së tij të mitur.
Pavarësisht përpjekjeve për t’i shpëtuar jetën, Daka ndërroi jetë si pasojë e plagëve të marra.
Lidhur me rastin, Policia ka arrestuar një person të dyshuar, ndërsa Prokuroria Themelore në Prizren ka njoftuar se ai është ndaluar për 48 orë.
Hetimet për zbardhjen e plotë të rrethanave të kësaj ngjarjeje po vazhdojnë.


