Stiven Shpendi ishte kthyer në një nga emrat më të lakuar në merkaton e futbollistëve në Itali, pasi sulmuesi i ri shqiptar, kishte spikatur me Çezenen në Serinë C duke shënuar me rregullsi në edicionin e kaluar. Në fund ishte Empoli që siguroi firmën e futbollistit, i cili u transferua te klubi i Serisë A dhe që tani ka debutuar në elitën e futbollit italian.
Një transferim për të cilin padyshim që është i lumtur lojtari shqiptar, por edhe drejtuesit e klubit të tij të ri.
Këtë e ka treguar edhe drejtori sportiv, Pietro Akardi, i cili ka zbuluar se firma me Shpendin ishte ajo që e kishte kënaqur më shumë këtë verë.
“Marrëveshja me e kënaqshme? Ajo me Shpendin, pasi dëshira e madhe e djaloshit na çoi që ta mbyllnim me kushtet që kishim paracaktuar që një muaj më parë. Dhe nuk është e lehtë, pasi shpesh mund të përballesh me personazhe që ndikohen. Por përkundrazi djaloshi dhe menaxher i tij e mbajtjen fjalën që na kishin dhënë. Bëhet fjalë për një lojtar të perspektivës, i cili hyn te parametrat e Empolit, me të cilin dëshironim që të punonim”, tha Akardi.
