Pas përfundimit të pushimeve të verës, Bashkimi Evropian është rikthyer plotësisht në detyrë dhe të enjten më 14 shtator, Përfaqësuesi i Lartë i BE-së, Josep Borell bashkë me emisarin sllovak Mirosllav Lajcak, do të ndërmjetësojnë takimin e radhës Kurti-Vuçiq.
Lidhur me këtë takim që do të mbahet nesër, kanë folur nga Ambasada e Shteteve të Bashkuara të Amerikës.
Një zëdhënës e Ambasadës së SHBA-së në Prishtinë ka thënë për Express se SHBA-ja vazhdon të mbështes fuqishëm dialogun e ndërmjetësuar nga Bashkimi Evropian si mënyrë për arritjen e një raporti paqësor dhe produktiv në mes të Kosovës dhe Serbisë.
Nga SHBA-ja gjithashtu kanë bërë thirrje për Kosovën dhe Serbinë që t’i marrin seriozisht obligimet që rrjedhin nga Marrëveshja e Ohrit dhe të fillojnë të lëvizin përpara në obligimet ekzistuese dhe të më hershme në kuadër të Dialogut dhe Marrëveshjes së Ohrit. Këtu vënë theksin tek themelimi i Asociacionit të Komunave me Shumicë Serbe.
“Kërkojmë nga Kosova dhe Serbia që t’i marrin seriozisht obligimet e tyre sipas marrëveshjes për normalizim që arritën në fillim të këtij viti dhe të fillojnë të ecin përpara në obligimet e tyre ekzistuese dhe të mëparshme sipas Dialogut dhe Marrëveshjes së Ohrit, duke përfshirë themelimin e Asociacionit të Komunave me shumicë serbe”, ka thënë një zëdhënëse e Ambasadës së SHBA-së në Prishtinë.
