Presidenti i Serbisë Aleksandar Vuçiq nga Kina ka folur për serbët e Kosovës duke thënë se e mbështet çdo vendim të tyre. Ai aty është pyetur edhe rreth shkrimeve të mediave serbe se është duke i maltretuar serbët e Kosovës me qasjen e tij.
“Unë do të mbështes çdo vendim të serbëve të Kosovës, duhet të jeni me popullin tuaj kur është e vështirë, nuk po e detyroj askënd, por mendoj se rrethanat kanë ndryshuar dhe duhet të mendojnë për zgjedhjet”, ka thënë kreu i shtetit serb Aleksandar Vuçiq.
“Nuk po i shtyj serbët në zgjedhje, s’po e detyroj askënd, as që mund ta bëj, nuk jam pronar i jetëve të tyre e as i të ardhmes së tyre” ka thënë ai.
Vuçiq ka vazhduar të shfaqet ‘konstruktiv” duke thënë se është e rëndësishme që “Beogradi dhe Prishtina të bisedojnë dhe të zhvillojnë një dialog” duke e akuzuar kryeministrin Kurti se nuk do dialog.
“Është e rëndësishme të flasim, të dialogojmë, edhe pse e dimë se nuk ka asgjë për të përfituar nga kjo, sepse Kurti nuk ka dashur asnjëherë dialog. Ne duam dialog, duam formimin e Asociacionit të Komunave Serbe, zbatimin e asaj që kemi rënë dakord, sidomos Marrëveshjen e Brukselit, e cila është nënshkruar gati 11 vjet më parë, kam frikë se nuk kemi bashkëbisedues për këtë, por edhe biseda më e keqe është më mirë se mos bisedë fare”, tha Vuçiq.
