Presidenti i Turqisë, Rexhep Taip Erdogan, ka deklaruar se kryeministri i Izraelit, Benjamin Netanyahu do të gjykohet për krime lufte, duke iu referuar ofensivës së izraelitëve në Rripin e Gazës.
Në një fjalim të mbajtur në Organizatën e Bashkëpunimit Islamik (OIC) në Stamboll, Erdogani tha se Netanyahu ka pranuar që po ndjek politika zgjerimi, duke shtuar se mbrojtja e Gazës është njësoj si të mbrosh qytete të tjera islamike të rajonit.
“Përtej faktit që është kriminel lufte, Netanyahu, i cili është kasapi i Gazës, do të gjykohet si i tillë, njësoj siç u gjykua Millosheviçi”, tha Erdogan, duke iu referuar ish-Presidentit të Jugosllavisë, Sllobodan Millosheviç, i cili u gjykua në Hagë për gjenocid, krime kundër njerëzimit dhe krime lufte në Kosovë, Bosnje dhe Kroaci.
Turqia ka qenë një nga kritikueset më të ashpra të Izraelit sa i përket ofensivës në Gaza, që nisi si përgjigje ndaj sulmit të Hamasit në 7 tetor. Ministria e Shëndetësisë në Gaza raporton se deri më tani, nga sulmet izraelite, kanë vdekur më shumë se 15 500 persona.
